ХӨДӨӨ АЖ АХУЙН ИХ СУРГУУЛЬ “ГАВАЛ ТОЛГОЙ”-Н ШИЛДГҮҮДЭЭ ТОДРУУЛЛАА

        “Монголын инновацын 7 хоног” арга хэмжээний хүрээнд ХААИС-иас уламжлал болгон жил бүр зохион байгуулдаг Оюутны инновацын шилдэг бүтээл шалгаруулах уралдааныг энэ удаад цар хүрээг өргөтгөн төрийн өмчийн 6 их сургууль хамтран “Гавал толгой” нэртэйгээр зохион байгуулагч 6 сургуулийн оюутнуудын дунд зарласан билээ.

“Гавал толгой” уралдааны зорилго нь оюутнуудын бүтээлч сэтгэлгээг хөгжүүлэх, хөгжлийн тулгамдсан асуудлыг эзэмшсэн мэдлэг, дэвшилтэт техник, технологи, инновац ашиглан оновчтой шийдвэрлэх саналаа боловсруулж, бүтээлээ танилцуулах, тэдний гарааны компани байгуулах, бизнес эрхлэх сонирхлыг хөхиүлэн дэмжих юм.

Уралдаанд оролцогч оюутнуудын бүтээлийг 2022 оны 4 дүгээр сарын 05-ны өдрөөс 2022 оны 5 дугаар сарын 10-ны өдрийг хүртэлх хугацаанд сургуулиуд хүлээн авч 

-        Тухайн сургуулийн шилдэг бүтээлийн шалгаруулалт

-        6 их сургуулиийн шилдэг бүтээлийн шалгаруулалт

-        Шилдгийн шилдэг бүтээл

гэсэн 3 үе шаттайгаар шалгаруулахаар уралдааны удирдамжид тусгагдсаны дагуу Хөдөө аж ахуйн эдийн засаг, инновацын хөгжлийн төвөөс Хөдөө аж ахуйн их сургуулийн эхний шатны шалгаруулалтыг 2022 оны 5-р сарын 03-ны танхим цахим хосолсон хэлбэрээр зохион байгууллаа.

Уралдааныг шалгаруулаах шүүгчдийн бүрэлдэхүүнд комисст ХААИС-ийн Бакалаврын сургалтын хөтөлбөрийн эрхлэгч, Хөдөө аж ахуйн шинжлэх ухааны зөвлөлийн ажлын албаны дарга, бүтээл ирүүлсэн бүрэлдэхүүн сургуулиудын эрдэмтэн нарийн бичгийн дарга нар, Хөдөө аж ахуйн эдийн засаг, инновацын хөгжлийн төвийн захирал гэсэн нэр бүхий 5 хүн томилогдон ажиллалаа.

“Гавал толгой” уралдаанд оюутнууд инновацын 9 бүтээл ирүүлж оролцсоноос таван шалгуур үзүүлэлтийн дагуу шүүгч тус бүр 0-5 оноогоор дүгнэж дараах 5 бүтээлийг дараагийн шатанд дэвшин оролцох эрхээр шагналаа.

-   “Төрөл бүрийн хүнсний ногоо үрлэх олон үйлдэлт үрлүүр зохион бүтээж туршсан дүн” Инженер, технологийн сургуулийн Хөдөө аж ахуйн инженерийн 4 дүгээр ангийн  оюутан И.Цэдэнжав, Н.Баасандамба, Б.Төрсайхан нар

-     “Чоно үргээх төхөөрөмж” Инженер, технологийн сургуулийн Цахилгаан хангамжийн 4 дүгээр ангийн оюутан Г.Хуягсүрэн, Б.Өлзийсайхан, Ш.Анхцэцэг, Б.Гүнжидмаа

-      “Сарлагийн болон үнээний сүүгээр хийсэн ИВЭН бяслагийн харьцуулсан судалгаа” Мал аж ахуй биотехнологийн сургуулийн Мах, сүү үйлдвэрлэлийн технологийн 4 дүгээр ангийн оюутан Г.Цэрмаа

-     “Мойлтой ээдэм үйлдвэрлэх технологийн судалгаа” Мал аж ахуй биотехнологийн сургуулийн Сүү үйлдвэрлэлийн 4 дүгээр ангийн оюутан Н.Батчимэг

-     “Компост бордоо” Дархан-Уул аймаг дахь Агроэкологи, бизнесийн сургуулийн  Агрономийн 4 дүгээр ангийн оюутан Б.Насанжаргал, мөн мэргэжлийн 3 дугаар ангийн оюутан Ч.Бямбадорж нар

Эдгээр шалгарсан бүтээл дараагийн шатанд төрийн өмчийн бусад 5 их сургуулийн оюутнуудын шилдэг инновацын бүтээлтэй өрсөлдөх юм. Уралдаанд бүтээлээ ирүүлж идэвхтэй оролцсон оюутнууд, удирдагч багш нартаа талархал илэрхийлж сургуулийнхаа шилдэг бүтээлээр шалгарсан оролцогчдодоо дараагийн шатны шалгаруулалтад амжилт хүсье.