МОНГОЛ-ХЯТАДЫН ТЕХНОЛОГИ ДАМЖУУЛАХ ТӨВ БАЙГУУЛАГДЛАА

         Монгол-Хятадын технологи дамжуулах төв Хөдөө аж ахуйн их сургуулийн Хөдөө аж ахуйн эдийн засаг, инновацын хөгжлийн төвд байгуулагдаж нээлтээ хийлээ. Нээлтийг Хөдөө аж ахуйн эдийн засаг, инновацын хөгжлийн төв зохион байгуулж ХХААХҮЯ, БШУЯ, Инновац, технологийн газар, ХААИС, БНХАУ-ын ӨМӨЗО-ны Хятад-Монголын технологи дамжуулах төвийн удирдлага, төлөөллүүд оролцон баяр хүргэж үг хэллээ.

Нээлтийн арга хэмжээнд БНХАУ-ын ӨМӨЗО-ны Шинжлэх ухаан хорооны Хятад-Монголын технологи дамжуулах төвийн удирдлага мэргэжилтнүүд цахим оролцож тус төвийн дэд захирал Ян Юн Пин Хятад-Монголын технологи дамжуулах төвийн зорилго, үйл ажиллагааг уригдан ирсэн зочид, төлөөлөгчдөд цахимаар танилцуулсан бол Хятад Монголын технологи дамжуулах төвийн зорилго үйл ажиллагааг Монгол Улсын ХААИС-ийн Хөдөө аж ахуйн эдийн засаг, инновацын хөгжлийн төвийн захирал, академич А.Бакей танилцууллаа.  

Монгол-Хятадын технологи дамжуулах төв нь Монгол Улс болон БНХАУ-ын их сургууль, эрдэм шинжилгээний байгууллага, аж ахуйн нэгжүүдтэй хамтран дэвшилтэт, шинэ технологи дамжуулах, үйлдвэрлэлд нэвтрүүлэх, оюуны өмчийг бизнесийн эргэлтэд оруулахад зуучлах замаар хоёр улсын шинжлэх ухаан, инновацын хөгжилд хувь нэмэр оруулах зорилготой байгуулагдаж байна.

Төв нь хоёр талын инновац, технологи дамжуулах хамтын ажиллагааг хөгжүүлэх хүрээнд эрдэмтдийн хамтын ажиллагааны сүлжээ байгуулан ажиллах, судалгааны хамтарсан төсөл, хөтөлбөр хэрэгжүүлэх, технологи дамжуулах, нутагшуулах, инновацын бүтээгдэхүүнийг хоёр талын зах зээлд гаргах, судлаачдыг мэргэшүүлэх, мэргэжлийг дээшлүүлэх, төрөлжсөн мэдээллийн сан бүрдүүлж, цахим хуудас ажиллуулах, аж ахуйн нэгж, байгууллагуудад зөвлөх үйлчилгээ үзүүлэх, холбогдох бусад үйл ажиллагааны чиглэлээр зуучлалын чиг үүргийг хэрэгжүүлэх аж.

ХААИС-ийн ректор Т.Хэрүүга:

-    Орчин цагийн шижлэх ухааны байгууллага байгуулагдсаны 100 жилийн ой тохиож буй онцгой жилд ХААИС судалгаагаар дамжуулаад инновац, технологи дамжуулах олон ажил төлөвлөсний нэг нь Монгол-Хятадын технологи дамжуулах төв юм. ХААИС 1958 онд байгуулагдсан цагаасаа сургалтын их сургууль, 2013 оноос судалгааны их сургууль болон ажиллаж байна. Монгол Улс 2022 оныг Шинжлэх ухааны жил болгон зарлахаар бэлтгэж буйтай төвийн нээлт давхцаж байгаа нь цаг үеэ олсон гэдгийг харуулж байна.  

БШУЯ-ны Шинжлэх ухааны газрын дарга, доктор Д.Баттогтох:

-   Хоёр орны шинжлэх ухааны хамтын ажиллагаа уламжлалт түүхтэй, жилээс жилд өргөжин тэлж байна. Тухайлбал, МУ-ын Шинжлэх ухаан технологийн сан, БНХАУ-ын Байгалийн шинжлэх ухааны сантай хамтарч төсөл хөтөлбөрүүд хэрэгжиж байгаагаас гадна энэхүү технологи дамжуулах төвийн хүрээнд хэрэгжих төсөл хөтөлбөр, санаачилгууд бий. БНХАУ-ын хөрөнгө оруулалт нь МУ-ын шинжлэх ухаан, шинжлэх ухааны дэд бүтэц, тоног төхөөрөмж, лаборатори гэх мэт руу чиглэсэн байдаг.

Бидний дутагдал бол сургалт, судалгаа үйлдвэрлэлийг холбосон дэд бүтэц, түүний тогтолцоог хөгжүүлэх асуудлыг цаасан дээр томьёолдог ч ажил хэрэг болгож чаддаггүй. МУ-ын хөдөө аж ахуйн салбарын тулгуур болж хөгжих боломжтой технологи дамжуулах төвийг хоёр улсын эрдэмтэн судлаачид, холбогдох удирдлагын баг хамтраад байгуулж байгаад талархалтай байна. Энэ төв бол зөвхөн БШУЯ биш бусад яам, эрдэм шинжилгээ, сургалт, үйлдвэрлэгчдийн холбоос болж ажилладаг чухал байгууллага байгаасай. Төвийг тогтвортой авч явах талд бодлого, эрх зүй, дэд бүтэц, хөрөнгө оруулалт БШУЯ-аас дэмжин ажиллах болно.

ХХААХҮЯ-ны Бодлого төлөвлөлтийн газрын дарга Ц.Болорчулуун:

-    Хүнс хөдөө аж ахуй, хөнгөн үйлдвэрийн салбарт БНХАУ-аас олон төсөл хөтөлбөрийг амжилттай хэрэгжүүлж байна, цаашдаа ч олон талаар хамтарч ажиллана. Аливаа салбарыг хөгжүүлэхэд шинжлэх ухааны байгууллагын үүрэг оролцоо маш чухал байдаг. Энэ утгаараа Монгол-Хятадын технологи дамжуулах төв салбартаа түүчээ болж ажиллана гэж найдаж байна. Төвийн үйл ажиллагаа цаашдаа улам бүр идэвхтэй өрнөж, хүнс хөдөө аж ахуй, хөнгөн үйлдвэрийн салбарт үр өгөөжөө өгсөн шинэлэг бүхний эхлэл байгаасай.

БНХАУ-ын ӨМӨЗО-ын ШУ-ны хорооны харьяа Хятад-Монголын технологи дамжуулах төвийн захирал И.Цогт:

-   Энэ төвийн төсөл бол 2018 онд Боловсрол соёл, шинжлэх ухаан спортын яам болоод БНХАУ-ын Шинжлэх ухаан технологийн яамнаас санаачилга гаргаж санхүүжилт хийгээд хоёр талын удирдлагууд, эрдэмтдийн тус дэмээр бүтээгдээд өнөөдрийн үе шатанд ирсэн билээ. Үүний дээр Хөдөө аж ахуйн их сургууль өндөр ач холбогдол өглөө. Үүнээс хойш Монгол-Хятадын технологи дамжуулах төв болоод Хятад-Монголын технологи дамжуулах төв маш нягт хамтарч ажиллана гэсэн итгэлтэй байна. 

Инновац, технологийн газрын дарга Д.Одгэрэл:

-    Монгол-Хятадын шинжлэх ухаан технологийн хамтын ажиллагааны үр дүн бодиторр биеллээ олж энэ төв нээгдэж буйд талархалтай байна. Төвийг байгуулах талаар тэртээ олон жилийн турш ӨМӨЗО-ны Шинжлэх ухааны танхим, Монгол Улсын Шижлэх ухааны яам, Шинжлэх ухаан, технологийн сан /ШУТС/, бусад байгууллага нэлээд хугацаанд ярилцаж байсан. Төвийг байгуулахад санхүүгийн болон бусад дэмжлэгийг үзүүлсэн  БНХАУ-ын Шинжлэх ухаан технологийн яам, Шинжлэх ухаан, технологийн хороо, Хятад-Монголын технологи дамжуулах төвд талархал илэрхийлье. Бид энэ төвийн үйл ажиллагаанд идэвхтэй оролцох хэрэгтэй, хүрээлэн, яамд бодлогоор, ШУТС  бодлогоор болон бусад зүйлээр дэмжиж ажиллахаа илэрхийлье. Эрдэмтэн судлаач та бүхний хамтын ажиллагаа биднээр хязгаарлагдахгүй улам өргөжөөсэй.

Монгол-Хятадын технологи дамжуулах төв зорилгынхоо хүрээнд эхний удаад бэлчээр хамгаалалт, малын тэжээл, мал үржүүлэг, малын эрүүл мэнд, хөрс хамгаалал, эко бордоо, хүнсний үйлдвэрлэлийн технологийн чиглэлээр БНХАУ-ын тэргүүлэх эрдэмтэд манай тариаланчид, мал аж ахуй эрхлэгчдэд лекц уншиж, сургалт зохион байгуулахаар ажиллаж байна. Мөн бизнес эрхлэгчдэд зориулан хүлэмжийн аж ахуйн ухаалаг технологийн чиглэлээр сургалт, зөвлөх үйлчилгээ үзүүлнэ. Мөн хоёр орны эрдэмтдын мэдээллийн санг байгуулах бөгөөд эхний ээлжинд Хятадын талаас 400, манай талаас 100 эрдэмтний судалгааны үндсэн чиглэл, бий болгосон технологи буюу инновацын бүтээл, хэрэглэгч, онцлог гэх мэт мэдээллийг бүрэн оруулахаар ажиллаж байна.