ОХУ, МОНГОЛ УЛСЫН СУДЛААЧИД БҮС НУТГИЙН ОРГАНИК ХӨДӨӨ АЖ АХУЙГ ХӨГЖҮҮЛЭХ ТАЛААР ЭРДЭМ ШИНЖИЛГЭЭНИЙ ЦАХИМ ХУРАЛ ЗОХИОН БАЙГУУЛЛАА

ОХУ-ын Суурь судалгааны сан, Монгол Улсын БШУЯ-ны санхүүжилтээр “Дэвшилтэт арга, технологид суурилсан органик хөдөө аж ахуйн хөгжлийн үзэл баримтлал боловсруулах нь” сэдэвт судалгааны төслийг Монгол Улсын ХААИС, ОХУ-ын Алтайн хязгаарын ХААИС-ийн судлаачид 2020 оноос эхлэн хамтран хэрэгжүүлж байгаа билээ. Тус төслийн Монгол талын удирдагчаар академич, Эдийн засгийн шинжлэх ухааны доктор, профессор А.Бакей, ОХУ-ын талын удирдагчаар Алтайн хязгаарын ХААИС-ийн профессор Эдийн засгийн шинжлэх ухааны доктор Кундиус В. А. нар ажиллаж байна. 

Төслийн хүрээнд “Монгол Улс болон ОХУ-ын бүс нутагт био эрчимжсэн технологид суурилсан органик хөдөө аж ахуйг хөгжүүлэх нь” сэдэвт эрдэм шинжилгээний цахим бага хурал  2021 оны 03 дугаар сарын 01-ний өдөр зохион байгууллаа.

Цахим хурлын нээлтийн үйл ажиллагаанд ОХУ-ын Алтайн хязгаарын Хөдөө аж ахуйн дэд сайд Михаил Чмырёв, Алтайн хязгаарын хүнс болон боловсруулах үйлдвэрлэлийн захиргааны орлогч дарга Александр Кондыков нар оролцож, хуралд оролцогчдод мэндчилгээ дэвшүүллээ. Дэд сайд М.Чмыров хэлсэн үгэндээ органик хөдөө аж ахуйг хөгжүүлэх нь хоёр орны иргэдийн, экологийн цэвэр бүтээгдэхүүн хэрэглэх хүсэл, сонирхолд тулгуурласан, цаг үеэ олсон чухал асуудал болохыг тэмдэглэж, А.Кондыков хэлэхдээ амьдралын эрүүл хэв маягийг хэвшүүлэх, ирээдүй хойч үеийнхээ өмнө хүлээх хариуцлагаа ухамсарлан хөдөө аж ахуйн үйлдвэрлэлд орчин үеийн дэвшилтэт, аюулгүй технологи нэвтрүүлэх хэрэгцээ урган гарч байгааг онцлов. Мөн хурлын нээлтийн үйл ажиллагаанд ОХУ-ын Алтайн хязгаарын ХААИС-ийн Эрдэм шинжилгээ, инновац эрхэлсэн дэд захирал, профессор Попов Евгений Сергеевич, Монгол Улсын ХААИС-ийн Эрдэм шинжилгээ, инновац эрхэлсэн дэд захирал, профессор Г.Гантулга нар оролцогчдод амжилт хүслээ.

Уг төслийн ОХУ, Монгол талын удирдагч Кундиус В.А., А.Бакей, нар био эрчимжсэн технологид суурилсан органик хөдөө аж ахуйг хөгжүүлэх үзэл баримтлал боловсруулах чиглэлээр хоёр талын судлаачдын өнгөрсөн хугацаанд хэрэгжүүлсэн судалгааны ажлын үр дүн, цаашид хэрэгжүүлэх судалгааны ажлын чиглэл, хүлээгдэж буй үр дүнгийн талаар товч танилцуулга хийсэн. 

Тус олон улсын бага хуралд ОХУ-ын Алтайн хязгаарын ХААИС-ийн профессор Кундиус В.А.“Монгол Улс, ОХУ-д органик хөдөө аж ахуйн “Ногоон эдийн засаг”-ийн бүс нутгийг хөгжүүлэх нийгэм эдийн засгийн үндэслэл”, профессор Ковалева И. В. “Органик бүтээгдэхүүний үйлдвэрлэлийн бүс нутгийг оновчтой тогтоох, зах зээлийн судалгаа”, доцент Горшков В.В. “Мал аж ахуйн органик үйлдвэрлэлд био эрчимжсэн технологи нэвтрүүлэх боломж”, доцент Стрельцова Т. В. “Малын органик тэжээл үйлдвэрлэл, тэжээлийн хангамж”, доцент Галкин Д. Г. “Органик хөдөө аж ахуйн үйлдвэрлэлд байгаль цаг уурын нөлөө” илтгэлүүдийг хэлэлцүүлэв. Монгол Улсын талаас академич А.Бакей, “Монгол орны бэлчээрийн боломжит даацад нийцүүлэн малын тоо толгойг зохицуулах  эдийн засгийн асуудлууд”, профессор Г.Гантулга “Органик, газар тариалангийн үйлдвэрлэлийн технологи сонгох үндэслэл”, дэд профессор Н.Баярсүх “Монгол орны газар тариаланд биоэрчимжсэн технологи нэвтрүүлэх шинжлэх ухааны үндэслэл”, доктор Г.Удвал “Монгол орны малын тэжээлийн нөөц, тэжээлийн шимт чанар” зэрэг илтгэл танилцуулсан болно. 

Цаашид хоёр талын судлаачдын хамтын ажиллагааг өргөжүүлэх, судалгааны үр дүнгээр олон улсын өндөр үнэлэмжтэй эрдэм шинжилгээний сэтгүүлд хамтарсан өгүүлэл нийтлүүлэх, дараагийн бага хурлыг 2021 оны 5 дугаар сард судалгааны ажлын арга зүйгээ харилцан нийцүүлэх чиглэлээр зохион байгуулахаар тохиролцов.